القرآن و الويكيبيديا

السلام عليكم

هذه تدوينة كنت كتبتها عندي أقل من جمعة في مدوّنة حزب الفكرون المتطرّف و هذا محتواها

بسم الله الرحمان الرحيم

اليوم فكرون من زملائي في المدوّنة طاح بتعليق حطّته الدكتورة بن سلامة على الصفحة الخاصة بها على الفايسبوك و هاذي تصويرة للتوثيق

و هذا رابط للمحتوى الأصلي

زميلي علّق على الكلام اللّي قالتّه الدكتورة بحماس و البعض من أصدقاءنا الفكارن عبّروا عن الاستياء و شافوا في كلامه مسّ من شخص الدكتورة

و هذا شنوّة ورد عن زميلي

و هذا رابط لكلامه

الساعة قبل ما نبداوا كان الدكتورة شافت في تعليق زميلي مسّ من شخصها نعتذرلها باسم  أعضاء حزب الفكرون المتطرّف و نوعدوا الجميع أنّه ما عاد حتّى انسان يتمسّ في شخصه

أمّا بعد

بعد ما تحوّل الدفاع على النّاس اللّي ينتقدوا في الاسلام الى فرض عين لا تكتمل الحريّات و الديمقرايطيّة الاّ بتمامه جاء الوقت اللّي باش نوضّحوا فيه بعض المفاهيم و نتناقشوا في الموضوع خارج اطار التعليقات على الفايسبوك

مانيش باش نقدّم أطروحة هوني لأنّ المدوّنة ماهيش المكان الأمثل لذلك و الوقت ما يسمحش للانتاج

لذا باش تكون تدوينة بسيطة من زوز أجزاء
الجزء الأوّل باش نجاوب فيه على كلام زوز أشخاص مباشرة معناها باش نقدّم مثال

الجزء الثاني باش نطرح فيه بعض الأسئلة و ابدي رأيي في مسألتين ولاّ ثلاثة

من التعاليق اللّي حبّيت نجاوب عليهم تعليق شافت فيه أخت اللّي عند حزب الفكرون مشكلة مع الدكتورة يوسف و مع الدكتورة بن سلامة

باهي باش نبداوا واضحين الدكتورة يوسف و الدكتورة بن سلامة عندهم آراء تمسّ من الاسلام السنّي اللّي هو دين أغلبية المسلمين في تونس و ساعات زملائي الفكارن يشوفوا في كلامهم استفزاز و ما يسكتوش

و لو أنّي نخيّر السكوت عنهم لا انقاصا من شأنهم لأنّه ليس من أخلاق المسلم التكبّر على النّاس و لكن لأسباب أخرى يمكن تجي الفرصة ان شاء الله و نوضّحها

أخ كذلك عبّر عن رأيه بتربية و انتقد تعليق زميلي و انقل كلامه كيما هو

franchement, l'un ne nie pas l'autre; on peut parler tous les jours de la situation politique, et se permettre de temps en temps d'exprimer sa propre opinion sur des sujets divers, je peux m'intéresser à mes études, à la révolution, à la politique, regarder un film et aller m'amuser le week end avec mes amis, et je pense que tout le monde fait pareil, mais avouez plutôt que ce que vous n'aimez surtout pas, c'est l'avis qu'elle viens d'exprimer. oui elle critique le coran, oui elle peut être athée, oui elle provoque un débat qui peut lui prendre 15 min sur son mûr et puis passer à autre chose, est ce là une raison de s'attaquer à elle? quand quelqu'un met un dou3a2 sur son mûr ça ne pose pourtant aucun problème! et bien que je n'approuve pas tout ce que fait cette femme, je trouve scandaleux le fait qu'elle se fasse tabasser partout sur facebook à cause d'une liberté qu'elle s'est permise d'exploiter! (et elle a écrit ça sur son propre mûr en plus, elle n'oblige personne à "aimer" sa page!)

للاجابة على الأفكار متاعه بالفكرة بالفكرة

1- اي عندك الحق الانسان ينجّم يفكّر و يقوم ببرشة حاجات في نفس الوقت

2- و عندك الحق كيف قلت اللّي ما عجبناش "رأيها". شخصيّا تعليقها ما عجبنيش و من حقّي أنّه ما يعجبنيش و أنّي نعبّر عن هذا

وما عندك حتّى حق باش تحاسب شخصي كان وقتلي نحاول نفرض رأيي على غيري بطرق غير الحوار و تبادل الأراء

3- و عندك الحق باش تقارن بين دعاء يتقرّب بيه مسلم لربّه من جهة و من جهة أخرى سؤال خبيث (و هذا رأيي) يضيّعلي وقتي و جزء من طاقتي و يضيّعلك وقتك و جزء من طاقتك (و هذا واقع) و نقعدوا نحكيوا في مسائل ما عندها حتّى أهميّة في رأيي

4- و عندك الحق أنّك تشوفها مسكينة و تستغلّ في حريّتها على الفايسبوك و الأشرار الافتراضيين ماهمش مخّلينها تعبّر
وعندي الحقّ باش ننتقد طريقتها في التبربيش و نتسائل علاش تبربش من أصله

بعد الاجابة على أراء الأخت و الأخ أصدقاءنا في حزب الفكرون هاو رأيي الشخصي المتواضع في حكايات الدكتورة بن سلامة و غيرها ماللّي يناقشوا في التفاصيل متاع عقائد النّاس

1- باهي لنفترض جدلا أنّه الهدف متاعها هو الاصلاح و تبيين العقيدة الصحيحة متاع المسلم

سؤالي في الحالة هاذي هل من الأحسن أنّك تجي كيما يقول الله في كتابه

(ادع إلى سبيل ربك بالحكمة و الموعظة الحسنة و جادلهم بالتي هي أحسن إن ربك هو أعلم بمن ضل عن سبيله و هو أعلم بالمهتدين)

ولاّ بتعاليق على الديناصورات اللّي ما تتعدّاش حسب رأيي مستوى التنبير؟

2- توّة لنفترض أنّها موش عاجبها الفكر السلفي مثلا ماو فمّة شكون يحبّ المسلم الزبراط المعتدل و ما يحبّش المسلم المصلّي المتزمّت

في الحالة هاذي الدكتورة تصفّي في حساباتها مع المتطرّفين بالسخرية من القرآن و في الثنيّة تخلّي استياء في صفوف المسلمين على بعضهم من السنّي و الاباضي و الشيعي و انت ماشي للأحمدي و هذا حسب رأيي المتواضع عمل غير مسؤول بالمرّة كيفه كيما كلام نبّار في السّتاد يتغنّى بأهازيج تسبّ في أهل الشمال الغربي مثلا

3- الفرضيّة الأخرى اللّي تجي على بالي هي أنّه الدكتورة تحبّ تدغدغ ضعف ايمان البعض بالتنبير فمّاشي ما يرتدّوا

نحبّ نعرف قدّاش الاحتمال بين 0 و 1 باش تنجح في تغيير عقيدة مواطن مسلم عشوائي؟

و قدّاش الاحتمال بين 0 و 1 باش يدخل مواطن مسلم عشوائي يسبّها ولاّ حتّى يهدّدها؟

و كان نواصلوا في نفس الفرضيّة متاع محاولة اخراج مسلم من دينه في الحالة هاذي بالنسبة للمسلم هي دخلت في حرب على الاسلام و الله غالب هذاكة شنوّة فمّة في الاسلام ما تدورش بالعقيدة متاعي ما ندورش بيك

باش ما نخلّيوش تعليق الدكتورة بن سلامة معلّق كنت جاوبت على صفحتنا على الفايسبوك و قلت اللّي المصحف ماهوش ويكيبيديا

كان هكّة تاو نسأل زادة علاش لم يذكر بوزون هيغز (Higgs boson)

و شبيه ما ذكرش المادّة السوداء (dark matter) و القوى الأربعة متاع الطبيعة (the universe's four forces)

حسب رأيي المتواضع اللّي يسأل عنده في العادة هدف

فمّة أسئلة لمعرفة ما خفي عن السائل معناها واحد يسأل باش يتعلّم ولاّ يعرف حاجة

و فمّة أسئلة لاختبار مستوى تمكّن انسان من المعرفة مثلا امتحان

و فمّة أسئلة أخرى يراد بها باطل تنبش في الشبهات و تفتن من آمن عن ايمانه. و الأخطر من هذا تفرق بين أبناء المجتمع الواحد بفتح الباب لنقاشات عقائديّة لا طائل منها

باش ما ندخلوش بعضنا و نقعدوا نهارين نرفعوا في اللّبس اختم بالقول بأنّه اللّي يحب يناقش كلامي ما يستشهدش بشيوخ الشرق ولاّ بالقاعدة ولاّ بالدول اللّي تقوم فيها أنظمة دينية حالية ولاّ قامت فيها في فترة من تاريخها

و السلام عليكم و رحمة الله و بركاته

---
زوروا مدوّنة حزب الفكرون المتطرّف هنا